ئەمێ تو جاری دەست ژ تێکۆشینا ئازادیا ژنان و پەرگالا ھەڤسەرۆکاتیێ بەرنەدن!

ژ چاپەمەنی و رایا گشتی رە

ئەمێ تو جاری دەست ژ تێکۆشینا ئازادیا ژنان و پەرگالا ھەڤسەرۆکاتیێ بەرنەدن!
ئەو شارەداریێن گەل کو ب کەد و بەردەلێن مەزنێن گەل ھاتبوون بدەستخستن و د سالا ٢٠١٦ان دە ژ ھێلا قەیووم ڤە ھاتبوون داگرکەرکرن، د ھلبژارتنا خوەجھییا ٣١ێ ئادارا ٢٠١٩ان دە ب سەرکەفتنەکە مەزن جارەکە دن ھاتن بدەستخستن. ئیقتیدارا ئاکپێ ب ھەموو ھەولدانێن خوەیێن ھیلەبازی نەکاری ئیرادەیا گەل بشکینە.
د رێڤەبەریا خوەجھی دە، د ئەساسا پارادیگمایا ئازادیا ژنانا دەمۆکراتیک و ئەکۆلۆژیک دە ھێز و تەڤلیبوونا ژنان د ئاستا ھەری ژۆر دە پێک ھاتیە.
د ھلبژارتنا ٢٠١٩انا رێڤەبەریا خوەجھی دە ب پەرگالا ھەڤسەرۆکاتییێ بەشداربوون چێبوو کو ل جیھانێ تەکانەیە. پەرگالا ھەڤسەرۆکاتیێ پەرگالەکە کو ل دژی پەرگال و ھشمەندیا مێرکسالارییا دەستھلاتدار تێدکۆشە، تێکۆشینا ژ ھۆلێ راکرنا تەھەکوم و ھیەرارشیا ل سەر ژنانە.
پەرگالا کو ب ئاوایەکی دەمۆکراتیک ژن نە د ناڤ دە بە، دێ ھەر تم مەھکومی بنکەفتنێ بە.
ھلبژارتنا رێڤەبەریا خوەجھییا ٣١ێ ئادارا ٢٠١٩انا کوردستانێ ب پۆلیتیکایا ئیتتیفاقێ پێک ھات. ئیتتیفاقا ھلبژارتنێیا کوردستانی نە تەنێ ئیتتیفاقا ھلبژارتنێ بوو، د ھەمان دەمێ دە بەیانا ھێڤی-باوەری، سەکن و ئیرادەیا جڤاکێ بوو. ژ ھۆلێ راکرنا توندی، زۆرداری و بێسیاسەتبوونا ل سەر گەلێ کورد بوو. ئەڤ ئیتتیفاق نە ئیتتیفاقەکە رۆژانە بوو، د ھەمان دەمێ دە خوەدی واتەیا خوەیا دیرۆکییە ژی.
وەک تژا خەباتێن یەکیتیا نەتەوەیی ژ بۆ مە یەکیتیەکە پێویست و ژێنەگەرە. د ڤێ مژارێ دە ب درێژاھیا پێڤاژۆیێ مە ھەستیاری نیشان دا و ئەمێ نیشان ژی بدن. ھەر وەکی کو ل رایا گشتی ژی دیار بوو، بەرەندامێ ئیتتیفاقێیێ شارەداریا ناڤچەیا دیجلەیێ فەلات ئایگۆرەن پەرگالا ھەڤسەرۆکاتیێ قەبوول نەکر و ئەو بێھەدی نیشان دا کو ھەڤالا مەیا ژن ژ پەیورێ بگرە. ئەڤ بوویەرا کو قەومی نیشان ددە کو زیھنیەتا کو ژ تێکۆشینا ئازادیا ژنان فام ناکە و شارەداریان تەنێ وەکی دەستھلاتداری و رانتێ دبینە، خوە رادەستی رەژیما قەیوومان کریە. د ڤێ چارچۆڤەیێ دە ئەم دەستنیشان دکن کو ئەمێ ھشمەندیا مێرکسالارانەیا فەلات ئایگۆرەن قەت قەبوول نەکن کو ژ بۆ ھەڤسەرۆکاتیا ناڤچەیا دیجلەیێ ھاتبوو ھلبژارتن.
دەنگ و ڤینا کو گەلێ ئەمیێ دیجلەیێ دایە نە ژ بۆ فەلات ئایگۆرەنە. ئەو دەنگ ژ بۆ ئیتتیفاقا کوردانە. د ڤێ واتەیێ دە دڤێ گەلێ دیجلەیێ ڤی کەسایەتی وەکی ڤین و موخاتاب نەبینە و ئیتیبارێ پێ نەکە. ژ بۆ ڤێ یەکێ دڤێ باش وەرە زانین کو د ھەقیقەتا دیرۆکێ دە کەسێن کو پشتا خوە ل گەل و ڤینا ژنان بادانە و باوەری ب سەرای و سەلتەنەتان ئانینە، دیسان دەم و دەوران دزڤرە و ب تێکۆشینا گەل و ژنان دچن وی جھی کو ئایدێیە، ئانگۆ دچن ناڤا رووپەلێن قرێژێن دیرۆکێ.
ژن دێ تو جاری دەست ژ تێکۆشینا خوەیا ئازادیێ بەرنەدن!
کەسێن کو ب زیھنیەتا قەیوومان رە تەڤدگەرن کو دژمنێ ژن و ئیرادەیا گەلە، بلا بزانن کو ژن دێ تو جاری دەست ژ تێکۆشینا خوەیا ئازادیێ بەرنەدن. مە دوھ چاوا ل ھەمبەر پۆلیتیکایێن قرێژێن دەستھلاتدار و شەرێ تایبەت ستوویێ خوە خوار نەکر، ئەمێ ئیرۆ ژی خوار نەکن و تێکۆشینا خوە ب بریارداری بەردەوام بکن. ھوونێ نەکارن ب زەخت، گەف و ئەقلێ خوەیێ دەستھلاتدارێ رێ ل بەر ژنان بگرن کو تێکۆشینا خوە نەمەشینن. دەستھلاتداریا ئاکپ و زیھنیەتا قەیووم بلا بزانن کو ژن دێ ستوو ل بەر زیھنیەتا وەیا نێرانە خوار نەکن.

تژا
٧ ئۆجاک ٢٠٢١