Newroz Nîşaneya Vejînê ye!-21.2024 Amed
Kedkarên çapemeniyê, jin, dayik û ciwanên hêja, nûnerên partî, sazî û rêxistinên demokratîk em xêrhatina we hemûyan dikin. Em îro ji bo eşkerekirina deklerasyona Newroza 2024’an hatine cem hev.
Wekî tê zanîn, Newroz nîşaneya vejînê ye. Bi taybetî vejîna gelê kurd û gelên Rojhilata Navîn û Mezopotamyaya qedîm. Ev vejîn, di heman demê de alaya jiyan û azadiyê ye, alaya têkoşînê ye li dijî serdest, zilimkar û yekperestan.
Û ev ala, ev jiyan û vejîn daye der ku li cihên ku zilm, tundî, qirkirin, tunehesibandin, bêedaletî û neheqî hebe, helbet dê li wir berxwedan û têkoşîn jî hebe. Li cihê ku têkoşîn û berxwedan lê hebe, helbet dê li wir ruhê Newrozê jî her li dar be û her bi ruh û can be. Ji lew re Newroz, berxwedan e. Ya ku felsefeya Newrozê nîşanê me daye, ev e.
Wekî her salê, em îsal jî Newrozê di şert û mercên cuda de pêşwazî dikin:
Di şert û mercên tundiyeke dijwar de, tundiyeke bi taybetî li ser jinan û bi giştî li ser tevahiya civakê.
Di şert û mercên qirkirina jinan de, qirkirineke pir xedar û hovane.
Di şert û mercên polîtîkayên şerê taybet de ku li welatê me ji bo bişavtin û qirkirina ciwanan û jinan, bişavtina ziman û çanda me her tiştî mubah dibîne.
Di şert û mercên tecrîdeke mutleq a li ser birêz Abdullah Ocalan de ku li tevahiya civakê û girtîgehan belav bûye û dibe sedema kûrkirina pirsgirêkan.
Di şert û mercên hilbijartinên xwecihî de ku derfeteke mezin e ji bo pêkanîna demokrasiyeke radîkal û rêveberiyeke bi reng û dengê xwe.
Û ya herî girîng jî di şert û mercên felsefe û berxwedana “Jin, Jiyan, Azadî”yê de ku bi pêşengiya jina kurd bûye cihê hêvî û rizgariyeke mezin ji bo hemû jinên cîhanê û azadiya civakê.
Wekî her salê, em ê îsal jî bi vê ferasetê, bi vê felsefe û berxwedanê agirê Newrozê gur bikin. Wekî her salê em ê îsal jî bi reng û dengê jinê agirê berxwedanê gur bikin. Alaya berxwedanê ya Zekiye, Rahşan û Semayan ku bi agirê Newrozê li ba bikin, bilind bikin.
Lewma banga me; bi taybetî li kirdeya sedsala 21’emîn hemû jinan û rêxistinên jinan û bi awayekî giştî li hemû gelan ew e ku em bi dirûşmeya “Rabe, Dema Azadî û Serkeftinê ye” bi ruhê Newrozê piştevanî û tifaqa xwe berfireh û xurt bikin. Ji lew re tenê bi vî ruhî avakirina jiyaneke azad, wekhev û demokratîk pêkan e. Bi vî ruhî em dikarin bibin yek û nirxên xwe yên hevpar biparêzin û xurt bikin. Em bi vî ruhî dikarin rê li ber qirkirin, tundî, kedxwarî û dagirkirinê bigirin û bi vî ruhî siyaseta demokratîk, aştiya civakî û aramiyê ava bikin.
Ruhê Newrozê azadiya jinê û azadiya gelan e.
Newroz vejîn e, Newroz hêvî ye, Newroz aştî ye.
Bijî Newroz!
Tevgera Jinên Azad (TJA)
